PACMAN!!!

O yey beybeh! Panalo ulit tayo! Panalo ulit ang lahing Pilipino! Yehey! Muling ipinakita ni Pacquiao ang tibay at lakas ng Pinoy sa buong mundo! Talagang siya ang “Pound-for-pound King”! Napakahusay din ng ipinakita ni Ricky “Hitman” Hatton. Iyon nga lang, sadyang napakalakas talaga ng suntok ni Pacman.

Bandang alas-dose ng tanghali, habang nakikinig kami ng misa sa Quiapo Church. Nagkaroon muna ng isang panalangin para sa pagpatnubay ng Panginoon sa kinahaharap ng buong mundo na H1N1 virus. Maya-maya, ilang minuto lang ang lumipas pagkatapos ng panalangin, nagsabi ang pari na napakatibay tila ng ating mga panalangin at panalo si Pacquiao sa Round 2. Ayun, alam na namin ang resulta. Pagkalabas ng simbahan, tinignan ko ang cellphone ko at may nag-text na nga sa akin na panalo nga si Pacquiao. Si tatay ko na lang ang hindi nakakaalam.

Habang pauwi kami, may mga nanonood ng laban sa telebisyon at may mga nagsasabi rin sa mga nanonood na dalawang round lang ang kalaban. Ako naman, kapag may nadadaanan na kumpulan ng tao, medyo sinisigaw ko na panalo na si Pacquiao. Hehe.

Pagdating sa bahay, sinabi ko na kay tatay ang nasagap kong balita at sabi niya, nakakawalang gana naman na daw. Hihi. At dahil ugali talaga ng mga sakim ang kumita ng pera, inorasan ko ang tagal ng pagpapalabas ng laban at patalastas.

Eto ang mga naitala kong oras mula sa pagkatapos kumanta ni Martin Nievera ng Lupang Hinirang hanggang matapos ang first round.

2:52 | 6:35 | 2:49 | 7:06 | 3:27 | 7:07 | 4:33

Grabe, doble pa ang haba ng patalastas sa palabas ng laban. Pagkakanta ng Lupang Hinirang, patalastas ka’gad. Tapos, maghihintay ka ng walang hanggan hanggang matapos ang mga commercial. Tsk. ‘Di ba, may batas tungkol dito? Sandali lang, may link ako tungkol sa isyung ito.

Pero grabe talaga ang lakas ni Pacquiao. Biruin mo ‘yon, tatlong beses niyang pinadapa ang Hitman ng Britanya. At talagang tulog na tulog si Hatton nang tumama ang kaliwang kamao ni Pacman noong mga huling segundo ng ikalang round. Ba’t ‘di man lang niya pinatagal ang laban. Maigsi e, nakakabitin. Kaya habang tinitipa ko ang post kong ito, pinapanood ng tatay ko ang replay ng laban. Hehe. Gayunpaman,

Congratulations Manny “Pacman” Pacquiao!

(Hmm. Maengganyo kayang bumalik sa pagbo-boksing si Mayweather, Jr.? Kung magkagayon nga, hehe, isa na namang nakakasabik na aksyon ang aabangan ng buong mundo.)

Mabuhay ka Pacquiao! Mabuhay ang lahing Pinoy!